lo verba lorxu cu daspo lo cinfo

By tijlan

lo verba lorxu cu daspo lo cinfo
puzuku ki bu'u lo tricu foldi goi fo'a so'i danlu cu xabju - ro da to ge lo barda moi gi lo cmalu moi toi ta'i lo mapti be tu'a vo'a cu panpi go'i

ku'i caku fo'a se klama pa cinfo goi C - C le fo'a xabju cu cunso kavbu ce'o ke to'e kecti citka - le se go'i mu'igi culno se raktu gi gunma casnu - co'i lo mu'e so'e tugni kei le danlu cu simxu co klama C noi ca'o donri sipna bu'u lo tricu ctino - le danlu cu stali fe'eco'u lo darno be C - pa gerku cu bancu klama gi'e cusku { doi ga'inai cinfo - mi'a ba'o platu da e'u.ga'inai } - C tai lo xalbo fa'a stedu carna gi'e cusku { mo } - le gerku { doi ga'inai cinfo - co'a le detri be le nu do ga'inai vitke le ti tricu foldi kei mi'a co'u sai panpi xabju - ki'ubo ka'enai kanpe jinvi lo du'u ca ma kau se gunta bo citka do ga'inai - je'u i'inainai pu sidbo fa lo nu da'i mi'a simxu ke rivbi cliva - ku'i ju'o la'e ri ka'e raktu do ga'inai } - C tai lo na'e gleki cu cmoni - le gerku { o'udai.e'o o'udai.e'o - pensi zgana e'o la'e di'e } sei ranji { da'i tu'e de'i ro da ge mi'a funca cuxna jivna gi lo to'e jinga cu binxo lo se citka moi - teta'ibo do ga'inai curmi lo nu lo drata cu zifre co'e bu'u le foldi tu'u - i'apei } - C ze'a pensi - spuda fi { je'e i'a - ei co'a le cabna djedi ko } gi'e sipna xruti

ki'uku ge le fo'a danlu seti'u lo mu'e lo solri cu midju cpana cu jmaji gi'e bi'unai jivna gi lo to'e jinga cu se benji fi C - caku lo verba lorxu cu to'e jinga - ri goi L cusku { doi ro do e'o curmi lo nu mi pa mei klama le cinfo - mi ai daspo ra - tezu'ebo lo nu ro do di'a panpi xabju } - { ue daspo le cinfo vau ki'a - gau do xu - ni'i ma go'e kakne } se krixa le danlu - L { ko xanka naku - mu'acu'i ei mi pamei gasnu } - ju'e L co'a go'i - le drata danlu cu ku'i mipri ke darno be L jersi - fe'epu'o lo srasu gunma poi C zvati vi ke'a ku'o L jinru lo tricu ctino - C loldi vreta gi'e denpa lo nu cidja benji - ku'i bu'odai no da vitke - C fai { uanai lerci - do'a ai za'o denpa } di'a sipna - lo solri cu vu'a farlu zenba - seki'unaibo ke'u na vitke fa lo cidja - C noi ba'o xagji cu co'i junri fengu - nejni culno ke sanli binxo gi'e bajra fa'a fo'a - cabo L ra'i zi plipe to'e canci gi'e fanta cusku { doi ga'inai cinfo - doi ga'inai traji - fengu fi ma } - C { { fengu fi ma } oile'o } sei se terpa voksa krixa { mi ba'o ze'u lo djedi cu denpa fi lo za'i xagji fau lo nu le do moi nu'o nupre gasnu - ainaisai fraxu - aile'o zi citka do } - L { oi doi ga'inai tsali cinfo ju'isai - je'u ba'o fasnu fa lo xlali noi au mi ca ctuca do ga'inai fo ke'a } - C { ma - ko sutra o'onaisai } - L { de'i le cabna lo mi bruna cu binxo lo to'e jinga be fo le jivna - ba'anai ge ai mi'a benji ra gi ku'i fe'eca'oku lo drata cinfo cu fa'a klama - ri secau lo nu sinma do ga'inai cu lebna le cidja - mi nau ba'o klama tezu'e lo nu cpedu lo se sidju do } - C { iacu'ile'o zasti fa lo tsali zmadu be mi } sei steba joi jilra - T { na'isai - li'asai do ga'inai zmadu - ku'i le cinfo cu xusra lo ionai du'u vo'a ka'e daspo do ga'inai fi'o temci lo ni re moi kancu - doi ga'inai i'apei mi gidva fa'a lo mipri zdani po ra } - { i'a ko sutra o'inaile'o } se krixa C - L seli'e gidva C mo'ifa'a lo bancu nenri be fo'a - L fe'eco'uvi lo jinto cu smaji cusku fi C fe { ju'i ko zgana - vi ta } - C mo'i jibni le jinto gi'e pa'o catlu lo nenri - ju'e bu'u lo manku ke djacu loldi da barda cinfo gi'e kinli denci jarco - li'ase'i le go'i cu sevzi ve minra fa lo djica - ku'i C na sai sanji la'e di'u - C krixa { ionaile'o - oiro'odaiba'a } gi'e sfubu le jinto noi condi - C zico'a jinru le djacu - co'u vasxu kakne - ja'ebo morsi binxo - L gleki plipe secu'u { ju'i ju'i uo daspo le cinfo - sai mo'u cinfo se terpa fasnu - sai di'a panpi } - ro le fo'a danlu cu bajra klama le jinto gi'e zgana birti lo du'u C ca'a morsi kei co'i - le go'i cu zanru tu'a L gi'e jimpe simxu secu'u { do'a lo ka ce'u tsali cu banli - maubo ku'i lo ka ce'u prije cu go'i }

fa'o